Dean Marlon

Dean Marlon

8. Januar 2005, 13.58 Uhr

35 SSW

Liebä Dean Marlon

 Du bisch Blüti vo Eusere Liebi

I dä letschtä 8 Monät hämmer gspürt wie Du gwachse und immer stärker worde bisch.

Dini Bewegigä und Dini Herztön händ zu Eusem Lebä ghört wie Euse Atem. 

Du bisch Eusi Zukunft. Du bisch Euses Lebä. 

Doch dänn hesch Du das Licht vo därä Welt erblickt, ohni es geseh.

Du hesch nöd gschraue und nöd Auge ufgmacht, nur mir händs gspürt.

Du hesch schönstä uf därä Welt erlebt – geborge und beschützt im Buch vom Mami mit Liebkosigä und Stimme vo Dim Papi und Dini Brüdere. 

Dä Schmerz isch unendli gross und doch isch Freud da gsi.

Mir händ Dich döfä i Euse Arme hebe, küssä und Dich betrachä. Wunderschön wie än Antlitz von ämä Engeli bisch Du i dä Wiege glägä. Am Liebe Gott het wohl eis im Himmel gfehlt.

 Glück und Leid sind so nah. Mir sind stolzi Eltere vo – Dean Marlon – wordä und möchtet Dich nümä losla.

 Du bisch Euse Sohn und Eusä Brüderund wirsch äs ewig bliebä.

 Trotzdem mönd mir Eus damit abfindä, dass mir Dich niä werded brülä ghörä, nie Dini erschte Wort ghörä, Dini erschte Schritt gseh und Dis Lächle gspürä. Euses Herz zerreists fascht, dara zdenkä, dass mir Dich nöd wachsä gsehnd.

 Doch jede Sunnästrahl isch äs Lächle vo Dir, jede Regätropf äs Tränli vo Dir, für das nöd hesch dofä bi Eus bliebä, jede Wulchä äs Sinnbild für Dini weichi und schöni Ustrahlig und jedes Flämmli än Beweis wie Eusi Liebi zu Dir i Eusem Herze lodered.

 Liebe Dean Marlon mir werded Dich ewig i Eusem Herzä trägä.

Mir liebed Dich so sehr und vermissed Dich so fescht. Mir werded Dich immer begleite.

 Din Papi Gerry

Dis Mami Katja

Dini Brüdere Marc und Maurice