Für üses gliebte Ängeli-Babyli 1

Üse Härzenswunsch isch so schnäu i Erfüuig gange,

dass mer üses Glück fasch nit hei chönne fasse.

Mir si überglücklich gsi u hei nis unheimlech uf di gfröit!!!

Doch leider isch dä Troum, mit dir dörfe ine nöie Läbesabschnitt

zstarte, di zberüehre, zbestuune u i Geborgeheit zbeschütze

ganz unverhofft platzt: Am 1.1.2008

ir 11. Schwangerschaftswuche

het dis chlyne Härzli plötzlech ufghört schla.

Warum nume? Mir wärde nie ä Antwort druf becho...

Oh Ängeli-Babyli, es isch so schwär das zbegriffe.

Obwouh du sicher di Grund hesch gha, um üs müesse zverla...

Es tuet so weh... Mir si unändlech truurig u vermisse di!!!

Mir hei di fescht gärn u wärde di nie vergässe,

du bliebsch für immer i üsem Härz.

Mami & Papi

Für üses gliebte Ängeli-Babyli 2

Wie gärn hätte mir di im Ougust i üsi Arme gno...

Wie gärn hätt dis grosse Schwösterli di göimelet u ghäbelet...

Vom Morge bis am Abe spiuts mit sim Bäbi u redet vom „Bébé“...

Wie gärn würde mir ihre säge, dass du immer no

i Mami's Buuch inne bisch, statt desse müesse mir erkläre,

du äs Ängeli bisch worde u itz im Himmu bisch...

Dä Troum, mit dir dörfe ine nöie Läbesabschnitt zstarte,

di zberüehre, zbestuune u i Geborgeheit zbeschütze

isch ganz unverhofft platzt: Am 1.1.2011

ir 8. Schwangerschaftswuche

hesch du üs trotz Bluetige im Ultraschau no zuegwunke

u dis Härzli het gschlage wie verruckt,

doch am 3.1.2011 bir Nachkontrouä bisch du nüme da gsi...

Warum nume? Mir wärde nie ä Antwort druf becho...

Sicher hesch du di Grund gha, um üs müesse zverla...

Aber mer chöis eifach nit begriffe, es isch so schwär.

Warum muess eim so ä schwäre Schicksausschlag

dopplet ufbürdet wärde? U de no zwöimau am Silvester...

Es tuet so weh... Mir si unändlech truurig u vermisse di!!!

Mir hei di fescht gärn u wärde di nie vergässe,

du bliebsch für immer i üsem Härz.

Mami & Papi mit Yaëlle Amélie a dr Hand

u Ängeli-Babyli 1 töif im Härz