Krümel

unser Krümeli

 

do mir di leider nie dörfe i unsere arme halte und mir dir das nie chöne verzelle, will ich das uf dem wäg mache:
 
am 14.12.04 frühe am morge, bi i im bad gstande mit äm schwangerschftstest i dr hand. i ha mi gfrogt: git är ägscht das mol zwei blaui strichli a?
jo äs het zwei strichli gä, aber i has nit chöne glaube und drum bi i am 08.00 uhr vor dr apotheke gstande, ha nomol zwei test kauft und bi ohni rächtsvortritt zbeacht i dr 30 zone heimdüst. sergäbniss: nomol vier roti strichli!
obwohl i mir immer vorgnoh ha, dass we du  mol unterwägs bisch, dim papi ä schöns überraschgsässe zmache, ha i das nit chöne. i ha sofort müesse bi ihm is gschäft alüte.
äs isch ihm glaub drümlig worde vor freud, de är het grad müesse ahne sitze.
so het die unglaublich schöni zyt mit dir agfange...
dinere uromi, omis, äm opa, onkel und götti händs mir a wiehnachte mitteilt, alli händ sich wahnsinnig uf di gfreut...
 
am 10.01.2005 i dr 9.ssw si mir zur verlaufskontrolle und dört hets gheisse, dass du viel zchli bisch, äm datum hinte noch!!! därztin het aber au gsait, mä chön erscht innere wuche genaus sage, viellicht würdsch jo no wachse...
di wuche isch dim papi und mir vorcho wie äs joor, mir si zwüsche hoffnig und trur grisse gsi
bis am 17.01.2005 bisch du leider nüm gwachse und am 19.01.2005 si mir de trennt worde...
 
liebs krümeli, du hesch i dere churze zyt unser härz gwunne, du hesch so ä riese platz i unserem läbe ignoh. mir händ scho so viel plän ka...
di papi het scho genau gwüsst, wie dis zimmer söll useh, dass är di wird uf dä schultere dure zolli trage, dir svelo fahre bi bringe und den aus pflaschter ufs chini kläbe wills nit ganz klappt het.
i ha uns drei gseh in dferie fahre, gseh wie du dört dure wald duesch renne.
liebs krümeli, du hinterlosch ä grosse riss i unserem härze und trotzdäm si mir glücklich di mol bi uns zka ha.
mir hoffe, do obe stellsch du mit dä andere ängelskinder ä huffe straich a, duesch uf wolkebäum chlätere und luegsch uns vo obe a...
 
mir wärde di nie vergässe      dis mami und papi