Schatzji

 

 

 

Ja lang hei mir uf di gwartet, mängisch hei mir üs vorgsteut wis de isch we mir üs wi Eltere dörfe füele. We äs Jahr ume isch, hei mir gspürt, dases im neue Jahr ganz sicher wird klappe, u so isches äs paar mau gange…

Wo mir de im Dezember füre Test bim Arzt si gsi, het d Arztghiufin mini Frou agluegt und gseit: „ Ja dir sit schwanger!“

Da hets mir d Bei ungerem Bode wäggrisse, i ha nümm chönne dänke, ha nume no grännet vor Fröid, ha mini Frou i d Arme gno u ha gwüsst, dass mir nümme s zwöit si.

Mir si hei gange und hei gwüsst, dass du ganz viu Rueh bruchsch, üses Schatzji, ja du söusch wachse und starch wärde. Ds Mami het immer Sorg gha und mir hei nume no vo dir gred.

Bim nöchschde Arztbsuech heimer ganz chli dis Härzli gseh schla, mir si so stolz gsi, hättes am liebschde aune gseit, dass s Mami di im Buch het. Dr Arzt het gseit, mir söue no chli warte mit säge, du sigsch no z chli, doch mir hei gwüsst, dass du üse Sunneschin wirsch wärde!

Ja mir hei viu mit dir gred u bim Ischlafe heimer mit dir dis Liedli glost.

Bim dritte Arztbsuech am 23. Januar 2008, wo du 11 Wuche alt bisch gsi, hei mir gwüsst, dass mir wider meh vo dir wärde gseh. I ha dis Mami gha und dr Doktor het dr Ultraschall gmacht. Är het di nümme gfunge, het gsuecht, mir hei ufe Bildschirm gluegt u ghoffet, aber du bisch furt, dis Härzli het nümme gschlage, mir hei di verlore! Du bisch so chli gsi u üse Schmärz so gross…

Das Gfüu elf Wuche uf di dörfe z warte, üs uf di z fröie, isch für üs ä wunderbari Zit gsi. I üsem Härz bisch du bi üs, mir dänke viu a di. Äs het ä Grund, du alleini weisches, warum du nid bi üs hesch chönne blibe, u mir wüsse, dass du niä allei wirsch si, du bisch immer i üsem Härz…

Machs guet Schatzji -  du bisch itze üses Engelti!

di Papa & dini Mama